வவுனியா வைத்தியசாலையில் கீழே விழுந்திருந்த ஒன்றரை பவுண் சங்கிலியை எடுத்த பொலிஸ் அதிகாரி ஒருவர் உரியவரிடம் ஒப்படைத்த சம்பவம் ஒன்று இடம்பெற்றுள்ளது.
நேற்று இடம்பெற்ற இச்சம்பவம் தொடர்பில் மேலும் தெரியவருவதாவது,
வவுனியா மருத்துவமனையின் பொலிஸ் காவல் மையத்தில் பணிப்புரிந்து கொண்டிருந்த பொலிஸ் சர்ஜென்ட் திலகரதன என்ற அதிகாரி, வைத்தியசாலையை சுற்றிப் பார்வையில் ஈடுபட்டிருந்த போது தரையில் விழுந்திருந்த ஒன்றரை பவுண் தங்கச் சங்கிலி கண்டெடுக்கப்பட்டது.
பின்னர் அந்த அதிகாரி இது குறித்து செவிலியர் குழுவினருக்கும் அறிவித்ததுடன், அந்த தங்கச் சங்கிலியை பொலிஸ் காவல் மையத்தில் பாதுகாத்து வைத்திருந்தார்.
இந்நிலையில்,, ஒரு பல்கலைக்கழக மாணவி தன் தாயாருடன் கண்ணீர் மல்க தன்னுடைய தங்கச் சங்கிலி விழுந்து விட்டதாக தேடி வந்த போது, மருத்துவமனை பொலிஸ் காவல் மைய அதிகாரிகள் அடையாளத்தை உறுதிப்படுத்திய பின்னர் அந்த சங்கிலியை மீண்டும் அவருக்குக் கையளித்தனர்.
மாணவியின் கண்களில் மகிழ்ச்சிக் கண்ணீர் வழிந்ததுடன் அந்த பொலிஸ் அதிகாரிக்கு நன்றி தெரிவித்தனர்.
